mayroon bang makakabatid
sa lumbay na dulot ng mahal
na lumisan na sa daigdig
na hindi na magagamot
ang pangungulilang manantiling mapait?
ilang luha ba ang aagos
sa mukha upang alisin ang waring tabak
na nakabaon sa dibdib
na nagbura ng mga pangarap
parang tubig dagat sa mga naukit sa buhangin?
anong magagawa ng pagtaghoy
sa araw o gabi
ngayong wala ka na sa piling
may kaaliwan ba sa iyong ala-ala
di ba lalo lamang umiigting?
kay daming pagsinta sana'y nabigkas
at narinig ng iyong tainga
at sa iyong puso'y nanahan
nguni't ang mga awit ko't tula
sino na ang makikinig?
No comments:
Post a Comment